LIBRAZHD – Një zjarr i përmasave të mëdha vijon prej gjashtë ditësh të përfshijë sipërfaqe pyjore në fshatin Dardhë të Bashkisë Librazhd, ndërsa përpjekjet për izolimin e vatrave po vështirësohen nga terreni i thyer malor, era e fortë dhe temperaturat e larta.

Dhjetëra efektivë të shërbimit zjarrfikës të Librazhdit, të mbështetur nga strukturat e emergjencave civile, janë angazhuar pa ndërprerje në terren për të frenuar përhapjen e flakëve dhe për të mbrojtur zonat pyjore.

Megjithatë, kushtet e vështira atmosferike kanë favorizuar përhapjen e zjarrit në një sipërfaqe të konsiderueshme me bimësi të thatë dhe masive pyjore. Terreni i thepisur ka kufizuar përdorimin e mjeteve zjarrfikëse, duke detyruar ekipet të ndërhyjnë në disa zona në këmbë.

Prioritet i autoriteteve mbetet izolimi i vatrave aktive dhe parandalimi i përhapjes së zjarrit jashtë zonës së prekur. Deri më tani nuk raportohet për persona të lënduar dhe nuk ka banesa të rrezikuara, pasi vatra e zjarrit ndodhet larg zonave të banuara.

Dardha e Librazhdit është një zonë me pasuri të konsiderueshme pyjore dhe dëmet mjedisore nga zjarri pritet të jenë të mëdha. Sipas të dhënave nga terreni, në zonën e prekur ndodhen edhe sasi të mëdha materiali drusor të thatë, të cilat favorizojnë përhapjen e flakëve.

Autoritetet kishin paralajmëruar më herët se Qarku i Elbasanit ishte ndër zonat me rrezik të lartë për zjarre, për shkak të temperaturave ekstreme dhe valës së të nxehtit që ka përfshirë vendin.

Strukturat e emergjencës vijojnë monitorimin e situatës dhe operacionet për shuarjen e plotë të zjarrit.