ZUBIN POTOK – Autoritetet e Kosovës kanë identifikuar një lokacion të ri në fshatin Jabukë të Zubin Potokut, ku dyshohet se mund të ndodhen mbetje mortore të personave të zhdukur gjatë luftës së viteve 1998–1999.

Sipas një njoftimi të përbashkët të Policisë së Kosovës dhe Prokurorisë Speciale, lokacioni u zbulua gjatë hetimeve që po zhvillohen paralelisht me gërmimet në fshatin Kalludër e Vogël, ku prej disa ditësh ekipet e forenzikës po kërkojnë mbetje të dyshuara njerëzore.

Autoritetet kanë bërë të ditur se do t’i drejtohen Gjykatës Themelore në Prishtinë për të siguruar autorizimin e nevojshëm për kryerjen e zhvarrimeve dhe ekzaminimeve forenzike në vendin e ri të identifikuar.

"Pas marrjes së autorizimeve përkatëse nga gjykata, Prokuroria Speciale, në koordinim me Policinë e Kosovës, Drejtorinë për Hetimin e Krimeve të Luftës dhe institucionet e tjera kompetente, do të ndërmarrë veprimet e nevojshme", thuhet në njoftimin zyrtar.

Ushtruesja e detyrës së presidentit të Kosovës, Albulena Haxhiu, reagoi duke e cilësuar dyshimin për një varrezë të dytë masive si një kujtesë të rëndë të krimeve të kryera gjatë luftës dhe një dëshmi se drejtësia ende nuk është vënë plotësisht në vend. Ajo shprehu gjithashtu solidaritet me familjet e personave të zhdukur, të cilat prej më shumë se dy dekadash presin të mësojnë fatin e të afërmve të tyre.

Sipas Institutit të Krimeve të Kryera Gjatë Luftës në Kosovë, 1.577 persona, kryesisht shqiptarë, rezultojnë ende të zhdukur nga lufta e fundit.

Ndërkohë, autoritetet kanë arrestuar edhe një person të tretë në kuadër të hetimeve për rastin në Zubin Potok. Sipas Policisë, janë siguruar prova që tregojnë se njëri prej të arrestuarve ka qenë pjesë aktive e Ushtrisë Jugosllave.

Gërmimet në Kalludër e Vogël dhe hetimet në lokacionin e ri në Jabukë janë rezultat i një hetimi rreth dyvjeçar. Kryeministri në detyrë i Kosovës, Albin Kurti, ka deklaruar se procesi i gërmimeve mund të zgjasë me muaj për shkak të terrenit të vështirë dhe shpërndarjes së mbetjeve mortore.

Kurti ka përsëritur gjithashtu thirrjen që Serbia të hapë arkivat shtetërore të periudhës së luftës, duke argumentuar se kjo do të ndihmonte në zbardhjen e fatit të rreth 1.600 personave që rezultojnë ende të zhdukur.

Autoritetet theksojnë se është ende herët për të folur mbi identitetin e viktimave të mundshme dhe se identifikimi do të varet nga analizat e ADN-së. Megjithatë, sipas deklaratave të kryeministrit në detyrë, ekziston mundësia që mbetjet t’u përkasin 23 shqiptarëve të zhdukur në atë zonë në prill të vitit 1999, të njohur si "grupi i intelektualëve".

Hetimet dhe gërmimet vijojnë, ndërsa institucionet kompetente synojnë të hedhin dritë mbi fatin e personave të zhdukur dhe të dokumentojnë krimet e kryera gjatë luftës në Kosovë.