FUSHË KRUJË – Një person ka mbetur i plagosur si pasojë e një aksidenti rrugor të ndodhur pranë nënkalimit të Fushë Krujës.

Sipas informacioneve paraprake, në vendngjarje kanë ndërhyrë forcat zjarrfikëse të Krujës, të cilat kanë përdorur mjete prerëse për të liruar automjetin e përfshirë në aksident nga trafikndarësja.

I plagosuri është transportuar me urgjencë në spital, ku po merr trajtimin e nevojshëm mjekësor. Deri më tani nuk janë bërë të ditura të dhëna mbi gjendjen e tij shëndetësore.

Në vendngjarje ndodhen shërbimet e Policisë dhe grupi hetimor, të cilët kanë nisur veprimet për të zbardhur shkaqet dhe rrethanat e aksidentit.

Autoritetet vijojnë hetimet, ndërsa pritet që në vijim të ketë më shumë detaje mbi dinamikën e ngjarjes.