GREQI – Zjarri i madh që ka përfshirë zonën e Megarës vijon të përhapet me intensitet, ndërsa pamjet e publikuara nga vendngjarja tregojnë momentet dramatike kur tre kuaj përpiqen t’i shpëtojnë flakëve.

Në videon e regjistruar pranë frontit të zjarrit, dy kuaj të rritur dhe një mëz shihen duke vrapuar mes tymit të dendur, ndërsa largohen me shpejtësi nga zona e rrezikuar. Pamjet pasqyrojnë përmasat e emergjencës që po përballon rajoni.

Flakët vazhdojnë të avancojnë në zonat e Kandilit dhe Agia Skepit, duke detyruar autoritetet greke të mobilizojnë një numër të madh forcash zjarrfikëse. Përpjekjet janë përqendruar në mbrojtjen e zonave Agios Nektarios dhe Kandili, si dhe në parandalimin e përhapjes së zjarrit drejt poligonit të qitjes dhe zonave të banuara.

Për shkak të rrezikut të lartë, banorët e zonave Skepi, Kandili dhe Botsika janë njoftuar për evakuim përmes sistemit të emergjencës 112, me udhëzim që të largohen në drejtim të Nea Peramos.

Zjarri mbetet aktiv, ndërsa ekipet zjarrfikëse, të mbështetura edhe nga ndërhyrjet nga ajri, vijojnë operacionet për izolimin e vatrave dhe minimizimin e dëmeve, në një betejë të vazhdueshme për mbrojtjen e jetës së banorëve, kafshëve dhe pronave.