MOSKË – Gjenerali rus Aleksandër Çajko dyshohet se ishte objektivi i një sulmi me bombë në një restorant në Moskë, ku humbën jetën pesë persona dhe u plagosën 19 të tjerë. Ngjarja ndodhi gjatë një feste me rastin e 55-vjetorit të lindjes së tij, në restorantin "Balzi Rossi", i vendosur vetëm pak qindra metra larg Kremlinit.

Sipas mediave ndërkombëtare, pajisja shpërthyese ishte një bombë artizanale e mbushur me sfera metalike, të cilat dyshohet se ishin vendosur për të rritur fuqinë shkatërruese të shpërthimit.

Dyshohet se bomba u soll në restorant nga një grua, e paraqitur si dhuratë. Sipas raportimeve paraprake, pajisja shpërtheu pasi u identifikua brenda ambienteve të lokalit. Gruaja që e kishte sjellë humbi jetën në vendngjarje.

Në festë merrnin pjesë politikanë rusë, zyrtarë të lartë ushtarakë dhe përfaqësues të shërbimeve të sigurisë. Mes viktimave është edhe 27-vjeçari Danil Perendri, dhëndri i gjeneralit Çajko dhe ish-lojtar profesionist i hokejit mbi akull.

Ndërkohë, vajza e gjeneralit, Maria Perendri, 25 vjeç, mbeti e plagosur rëndë. Sipas raportimeve, ajo ka pësuar dëmtime serioze në kokë dhe po merr trajtim mjekësor.

Autoritetet ruse kanë nisur hetimet për të zbardhur rrethanat e shpërthimit, ndërsa deri më tani nuk është dhënë një version zyrtar mbi autorët apo motivet e mundshme të sulmit.