HIMARË – Katër persona janë shoqëruar nga Policia pas një operacioni rreth dyorësh në det, following raportimeve për të shtëna me armë zjarri nga një jaht që lundronte pranë bregdetit të Palasës.

Sipas burimeve, mes të shoqëruarve janë Astrit Gjonpalaj, ish-punonjës policie dhe pronar i kompanisë "Globus Travel", si dhe Astrit Meta, shtetas shqiptaro-amerikan. Dyshohet se të dy ndodheshin në bordin e jahtit në momentin kur u dëgjuan të shtënat.

Ngjarja është regjistruar rreth orës 21:00, pasi pushues të pranishëm në zonë njoftuan autoritetet se kishin dëgjuar të shtëna me armë zjarri nga një mjet lundrues. Menjëherë pas sinjalizimit, Policia Kufitare dhe Njësia Policore Detare nisën një operacion për lokalizimin dhe ndalimin e jahtit.

Sipas informacioneve paraprake, gjatë ndjekjes dy persona tentuan të largoheshin me gomone drejt bregut, por pasi konstatuan praninë e forcave të policisë, u rikthyen në jaht. Ndërkohë, një person tjetër u hodh në det në përpjekje për t’u larguar, por u kap nga Policia Kufitare.

Fillimisht, jahti dyshohet se mori kursin drejt ujërave greke, por më pas ndryshoi drejtim. Gjatë ndjekjes, ekuipazhi fiku dritat e mjetit në përpjekje për t’iu shmangur autoriteteve. Pas rreth dy orësh operacion, policia arriti ta ndalojë jahtin dhe ta shoqërojë në Portopalermo, ku iu nënshtrua një kontrolli të imtësishëm.

Deri në këtë fazë të hetimeve, autoritetet nuk kanë bërë të ditur nëse në bord është gjetur armë zjarri apo sende të tjera me interes për hetimin. Gjithashtu, mbeten ende të paqarta motivet e të shtënave, si edhe identiteti i personit që dyshohet se ka qëlluar.

Policia vijon hetimet për zbardhjen e plotë të rrethanave të ngjarjes dhe dokumentimin e përgjegjësive ligjore të personave të përfshirë.