Deputetja e Partisë Demokratike, Elda Hoti, ka bërë të ditur ndarjen nga jeta të bashkëshortit të saj, përmes një postimi prekës në rrjetet sociale.

Në mesazhin e publikuar, Hoti i jep lamtumirën partnerit të jetës me fjalë të mbushura me dhimbje, duke shprehur boshllëkun që ka lënë humbja e tij.

“U prehsh në paqe, i miri i zemrës time! Ladi im, shpirti im. Do na mungosh gjithë jetën”, shkruan deputetja, teksa postimin e ka shoqëruar edhe me fotografi.

I ndjeri la pas dy fëmijë.

Vëllai i të ndjerit, Aleksandër Ndoja njofton se 46-vjeçari u nda papritur nga jeta si pasojë e një ataku kardiak.

Përmes një postimi në rrjetet sociale, ai shkruan se kjo është një goditje e rëndë dhe e papritur për familjen e tyre.

“Me dhimbje të thellë njoftojmë se vëllai ynë i dashur, Ladi Ndoja, u nda papritur nga jeta në moshën vetëm 46-vjeçare, si pasojë e një ataku kardiak. Një goditje e rëndë dhe e papritur për familjen tonë, që na ka lënë pa fjalë dhe me një dhimbje të pamasë. Ladi la pas bashkëshorten e tij të dashur Elda Hoti dhe dy fëmijët e vegjël, të cilëve u mungon tashmë shtylla e familjes së tyre. Në këto çaste të vështira, kërkojmë mirëkuptimin e të gjithë miqve, të afërmve dhe dashamirësve, ndërsa përpiqemi të përballojmë këtë humbje të rëndë. U prehsh në paqe, i dashur Ladi! Kujtimi yt do të mbetet përherë në zemrat tona”, shkruan ai.