Bulqizë, 3 gusht 2026 – Shtatë qytetarë janë shpëtuar nga rrjedha e lumit Drini i Zi në Bulqizë, pasi mbetën të bllokuar si pasojë e rritjes së menjëhershme të nivelit të ujit.

Sipas njoftimit zyrtar të Policisë, shërbimet e Komisariatit të Policisë Bulqizë ndërhynë menjëherë pas marrjes së një telefonate nga një qytetar, i cili kërkoi ndihmë pasi ai dhe gjashtë familjarë të tij kishin mbetur të izoluar në zonën e njohur si “Ura e Gjoricës”.

Në bashkëpunim me strukturat e Emergjencave Civile të Prefekturës Dibër dhe shërbimin zjarrfikës, u organizua një operacion shpëtimi, gjatë të cilit të shtatë qytetarët u evakuuan me gomone nga rrjedha e lumit.

Fatmirësisht, të gjithë janë në gjendje të mirë shëndetësore dhe nuk kanë pësuar lëndime.

Policia e Dibrës apelon për kujdes të shtuar gjatë qëndrimit pranë lumenjve dhe zonave ujore, veçanërisht në raste kur niveli i ujit mund të rritet papritur. Gjithashtu, u bën thirrje qytetarëve të njoftojnë menjëherë Policinë në çdo rast nevoje, për të mundësuar ndërhyrje sa më të shpejtë të shërbimeve të emergjencës.