Detaje të reja janë zbardhur nga incidenti me armë zjarri i regjistruar mbrëmjen e së dielës pranë bregdetit të Palasës.

Sipas informacioneve paraprake, personat që ndodheshin në jaht e kanë braktisur mjetin lundrues pas ngjarjes dhe janë larguar me një gomone në drejtim të Palasës.

Ndërkohë, Policia Kufitare ka bërë të mundur lokalizimin dhe tërheqjen e jahtit në breg, ku po kryhen veprimet hetimore dhe ekspertimet për mbledhjen e provave.

Forcat e policisë kanë nisur kërkimet për identifikimin dhe kapjen e autorëve të dyshuar, ndërsa kontrollet vijojnë si në det ashtu edhe në zonën bregdetare.

Grupi hetimor po punon për dokumentimin e plotë të ngjarjes, identifikimin e personave të përfshirë dhe sqarimin e rrethanave në të cilat u qëllua me armë zjarri.

Himarë/Informacion paraprak

Rreth orës 21:00 është njoftuar se nga një jaht në det, përballë Palasës, dyshohet se është qëlluar me armë zjarri në ajër.

Menjëherë pas marrjes së njoftimit, shërbimet e Policisë Kufitare dhe të Njësisë Policore Detare janë vënë në ndjekje të jahtit.

Njëkohësisht, janë njoftuar edhe shërbimet e Komisariatit të Policisë Himarë dhe të Stacionit të Policisë Dhërmi, të cilat po kryejnë kontrolle nga toka përgjatë vijës bregdetare.

Vijon ndjekja e mjetit lundrues, me qëllim verifikimin e informacionit dhe dokumentimin e plotë të ngjarjes.

Në përfundim të operacionit për ndalimin e jahtit dhe të veprimeve të para hetimore do të jepet informacion i plotë për rastin.