Policia Kufitare dhe Njësia Policore Detare kanë nisur një operacion për lokalizimin dhe ndalimin e një jahti, pasi dyshohet se nga bordi i tij janë qëlluar të shtëna me armë zjarri në ajër.

Sipas informacionit paraprak të Policisë, rreth orës 21:00 është marrë njoftimi se nga një jaht që ndodhej në det, përballë Palasës, janë dëgjuar të shtëna me armë zjarri.

Menjëherë pas sinjalizimit, shërbimet e Policisë Kufitare dhe të Njësisë Policore Detare janë vënë në ndjekje të mjetit lundrues, ndërsa në operacion janë përfshirë edhe efektivët e Komisariatit të Policisë Himarë dhe të Stacionit të Policisë Dhërmi.

Forcat e policisë po kryejnë kontrolle edhe nga toka përgjatë vijës bregdetare, me qëllim identifikimin e personave të përfshirë dhe dokumentimin e plotë të ngjarjes.

Operacioni për ndalimin e jahtit vijon, ndërsa policia ka bërë të ditur se, pas përfundimit të veprimeve të para hetimore, do të japë informacion të plotë mbi rrethanat e incidentit.

Himarë/Informacion paraprak

Rreth orës 21:00 është njoftuar se nga një jaht në det, përballë Palasës, dyshohet se është qëlluar me armë zjarri në ajër.

Menjëherë pas marrjes së njoftimit, shërbimet e Policisë Kufitare dhe të Njësisë Policore Detare janë vënë në ndjekje të jahtit.

Njëkohësisht, janë njoftuar edhe shërbimet e Komisariatit të Policisë Himarë dhe të Stacionit të Policisë Dhërmi, të cilat po kryejnë kontrolle nga toka përgjatë vijës bregdetare.

Vijon ndjekja e mjetit lundrues, me qëllim verifikimin e informacionit dhe dokumentimin e plotë të ngjarjes.

Në përfundim të operacionit për ndalimin e jahtit dhe të veprimeve të para hetimore do të jepet informacion i plotë për rastin.