Detaje të reja janë zbardhur nga përplasja tragjike e dy helikopterëve zjarrfikës gjatë operacionit për shuarjen e zjarreve në zonën e Psathës, në Atikë, Greqi.

Si pasojë e aksidentit ajror, dy persona kanë humbur jetën dhe dy të tjerë kanë mbetur të plagosur. Viktimat janë një shtetas grek dhe një shtetas rumun, ndërsa dy anëtarët e tjerë të ekuipazheve janë shpëtuar nga ekipet e kërkim-shpëtimit.

Sipas burimeve pranë kompanisë që kishte dhënë me qira helikopterët për Shërbimin Zjarrfikës grek, dyshimet paraprake për shkakun e përplasjes lidhen me një gabim njerëzor. Megjithatë, autoritetet kanë nisur hetimet për të përcaktuar me saktësi rrethanat e ngjarjes.

Në bordin e dy mjeteve ajrore ndodheshin gjithsej katër persona, dy shtetas grekë dhe dy shtetas të huaj. Pas përplasjes, forcat e kërkim-shpëtimit u aktivizuan menjëherë dhe arritën të lokalizonin të gjithë anëtarët e ekuipazheve.

Dy prej tyre u gjetën të gjallë dhe u transportuan për marrjen e ndihmës mjekësore, ndërsa dy të tjerët u nxorën pa shenja jete.

Helikopterët ishin ngritur nga aeroporti i Elefsinës për t’u angazhuar në operacionet kundër zjarreve në zonën Atikë–Beoti. Autoritetet greke vijojnë hetimet për zbardhjen e plotë të shkaqeve dhe përgjegjësive të kësaj tragjedie.