Ernest Muçi vijon të tregojë formë të shkëlqyer në prag të sezonit të ri, duke lënë sërish gjurmë në një ndeshje miqësore me fanellën e Trabzonspor.

Sulmuesi i Kombëtares shqiptare ka gjetur rrugën e rrjetës ndaj Udinezes, skuadrës së Serisë A italiane, duke zhbllokuar sfidën që në minutën e katërt.

Muçi mori topin në krahun e majtë të sulmit dhe, me një goditje të saktë me pjesën e brendshme të këmbës nga brenda zonës, befasoi portierin Piana, duke i dhënë avantazhin skuadrës turke.

Ky ishte një tjetër konfirmim i momentit pozitiv që po kalon 24-vjeçari, i cili po fiton gjithnjë e më shumë rëndësi në formacionin e Trabzonspor.

Sezonin e kaluar, Muçi ishte një prej lojtarëve më produktivë të skuadrës turke. Në 26 ndeshje të kampionatit ai realizoi 11 gola dhe dhuroi 3 asistime, duke u shndërruar në një nga figurat kryesore të ekipit.

Paraqitjet e tij të vazhdueshme kanë rritur pritshmëritë ndaj sulmuesit shqiptar, ndërsa forma e treguar në përgatitjet para sezonit të ri tregon se Muçi është gati të luajë një rol të rëndësishëm në aventurën e tij të radhës me Trabzonspor.