Një mjet lundrues tip Jet Ski është bllokuar nga Policia Kufitare dhe Njësia Policore Detare në Dhërmi, pasi u konstatua se drejtohej nga një 12-vjeçar.

Gjatë kontrolleve të intensifikuara për garantimin e sigurisë në hapësirat detare, shërbimet policore, përballë plazhit të Dhërmiut, ndaluan mjetin lundrues dhe kryen verifikimet përkatëse. Nga kontrolli rezultoi se drejtuesi ishte i mitur dhe mjeti nuk dispononte në bord dokumentacionin e detyrueshëm.

Për shkeljet e konstatuara, pronari i mjetit, shtetasi me inicialet M. Xh., u ndëshkua me masë administrative prej 10 mijë lekësh të rinj. Gjithashtu, mjeti lundrues u bllokua nga autoritetet.

Policia Kufitare u bën apel qytetarëve dhe subjekteve që japin me qira mjete lundruese që të mos ua besojnë ato të miturve apo personave që nuk plotësojnë kushtet ligjore për drejtimin e tyre.

Sipas autoriteteve, përdorimi i mjeteve lundruese nga persona të papërshtatshëm, veçanërisht nga të miturit, përbën rrezik për jetën dhe shëndetin e tyre, si dhe për sigurinë e pushuesve dhe përdoruesve të tjerë të hapësirave detare.

Policia Kufitare dhe Njësia Policore Detare vijojnë kontrollet përgjatë gjithë vijës bregdetare, me qëllim parandalimin e shkeljeve, respektimin e perimetrit të sigurisë dhe zbatimin e rregullave të lundrimit.