Ekipet e shpëtimit kanë bërë të mundur nxjerrjen e trupit të pajetë të 40-vjeçarit Ilir Kolaveri, i cili humbi jetën pas një aksidenti në minierën e kromit në Tërnovë, në Bulqizë.

Ngjarja ndodhi të shtunën, kur minatori dyshohet se ra në një furnelë brenda galerisë dhe mbeti i bllokuar nën një masiv minerali. Menjëherë pas aksidentit u angazhuan ekipet e shpëtimit, të cilat zhvilluan një operacion të vështirë për shkak të terrenit të rrezikshëm dhe rrezikut nga shembje të tjera në galeri.

Pas rreth 24 orësh kërkime dhe ndërhyrjesh, trupi i 40-vjeçarit u nxor nga galeria, por ai ishte pa shenja jete.

Trupi i pajetë është transportuar drejt Institutit të Mjekësisë Ligjore në Tiranë, ku do t’i nënshtrohet ekspertizës për përcaktimin e shkakut të vdekjes.

Miniera e kromit në Tërnovë administrohet nga kompania "Eternal Security". Ndërkohë, autoritetet kanë nisur hetimet për të zbardhur rrethanat e plota të aksidentit dhe për të verifikuar nëse gjatë aktivitetit minerar janë respektuar standardet dhe masat e sigurisë teknike.