EUROPË – Grupet kriminale në Europë po përdorin një metodë të re për kryerjen e atentateve, duke rekrutuar adoleshentë përmes rrjeteve sociale dhe duke i përdorur si ekzekutorë me pagesë. Një analizë e publikuar nga BBC e përshkruan fenomenin si “vrasës adoleshentë me pagesë” dhe thekson se të rinjtë shpesh manipulohen përmes një modeli të ngjashëm me lojërat online.

Një nga rastet e përmendura është ai i 18-vjeçarit Atilla Azimov, i cili vrau një 20-vjeçar në periferi të Stokholmit. Sipas hetimeve, ai ishte rekrutuar nga Rrjeti Foxtrot, një grup kriminal i akuzuar për një seri vrasjesh dhe sulmesh në Europë.

Sipas BBC, grupet e tilla u premtojnë adoleshentëve pagesa të mëdha për kryerjen e sulmeve, por në shumë raste ata arrestohen përpara se të marrin shpërblimin.

Fenomeni është trajtuar edhe nga Task Forca Operacionale GRIMM e Europolit, e krijuar për të luftuar këtë formë kriminaliteti. Sipas ekspertëve, rekrutimi bëhet kryesisht në mediat sociale, ku detyrat u paraqiten të rinjve në një mënyrë të “lojëzuar”, duke i bërë ata të shohin aktet kriminale si misione të ngjashme me ato të lojërave kompjuterike.

Kreu i Qendrës Europiane Kundër Krimit të Organizuar dhe të Rëndë të Europolit, Andy Kraag, e ka cilësuar këtë praktikë si “delegim të llogaritur të vrasjes” te të rinjtë vulnerabël.

Sipas të dhënave të Europolit, fenomeni i njohur si VaaS (Violence as a Service – Dhuna si Shërbim) ka prekur disa vende europiane, përfshirë Suedinë, Danimarkën, Finlandën, Francën, Gjermaninë, Islandën, Holandën, Norvegjinë, Spanjën dhe Mbretërinë e Bashkuar.

Një tjetër rast i hetuar është ai i adoleshentit norvegjez Johannes Natland, i dënuar për përgatitjen e një atentati në Mbretërinë e Bashkuar. Sipas hetimeve, ai ishte kontaktuar përmes platformave online dhe ishte udhëzuar hap pas hapi përmes mesazheve të koduara, nga persona që përdornin pseudonime.

Hetuesit dyshojnë se disa nga sulmet e lidhura me Rrjetin Foxtrot mund të kenë pasur edhe motive politike, përfshirë sulme ndaj objektivave izraelite në Europë, ndërsa raste të tjera lidhen me përplasjet mes grupeve kriminale për kontrollin e trafikut të drogës.

Analiza e BBC thekson se përdorimi i të miturve dhe të rinjve nga organizatat kriminale përbën një sfidë të re për autoritetet europiane, pasi rekrutimi online e bën më të vështirë identifikimin dhe parandalimin e këtyre skemave.