VLORË – Një zjarr ka përfshirë një apartament në katin e tretë të një pallati në rrugën Transballkanike, në qytetin e Vlorës, duke shkaktuar panik te banorët e zonës.

Sipas informacioneve paraprake, banorët kanë dalë menjëherë jashtë banesave për shkak të rrezikut nga flakët dhe tymi.

Forcat e shërbimit zjarrfikës mbërritën në vendngjarje dhe po punojnë për izolimin dhe shuarjen e zjarrit, si edhe për vënien nën kontroll të situatës.

Deri më tani nuk raportohet për persona të lënduar. Ndërkohë, shkaqet e zjarrit mbeten ende të paqarta.

Në vendngjarje ndodhen edhe efektivët e Policisë, të cilët kanë rrethuar zonën dhe kanë nisur veprimet hetimore për të përcaktuar shkaqet dhe rrethanat e ngjarjes.