DIBËR – Policia e Dibrës ka finalizuar operacionin antidrogë të koduar “Deja”, në kuadër të kontrolleve intensive në terren dhe monitorimit me dronë për goditjen e rasteve të kultivimit të bimëve narkotike.

Gjatë operacionit, në një parcelë të kultivuar në vendin e quajtur “Liqeni i Lukanit”, pronë publike në territorin e Bashkisë Dibër, u konstatuan 1,121 bimë të dyshuara narkotike të llojit Cannabis Sativa.

Në flagrancë u arrestuan dy persona të dyshuar për kultivimin e parcelës: A.K., 38 vjeç, banues në Kamëz, dhe A.B., 39 vjeç, banues në fshatin Derjan, Bashkia Mat.

Sipas Policisë, bimët narkotike u asgjësuan në vendngjarje me anë të djegies.

Operacioni u zhvillua mbi bazën e informacioneve të siguruara nga specialistët për Hetimin e Krimeve në Drejtorinë Vendore të Policisë Dibër, në bashkëpunim me shërbimet e Komisariateve të Policisë Dibër, Mat dhe Kamëz.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër për veprime të mëtejshme.

Policia u ka bërë thirrje qytetarëve, veçanërisht banorëve të zonave rurale, të denoncojnë çdo rast apo informacion mbi kultivimin e bimëve narkotike, duke theksuar se bashkëpunimi me publikun mbetet thelbësor në luftën kundër kësaj veprimtarie kriminale.