BULQIZË – Vijojnë pa ndërprerje kërkimet për gjetjen e minatorit Ilir Kolaveri, i cili dyshohet se ka humbur jetën pas një aksidenti të ndodhur në një galeri të minierës në zonën e Tërnovës së Madhe, Njësia Administrative Zerqan, Bashkia Bulqizë.

Ngjarja ndodhi të shtunën, kur 40-vjeçari ra në një furnelë brenda galerisë dhe më pas u zu poshtë nga një masiv minerali.

Sipas autoriteteve, operacioni i kërkim-shpëtimit po zhvillohet në kushte të vështira për shkak të strukturës së minierës dhe rrezikut për shembje të mëtejshme, çka e bën ndërhyrjen tepër të ndërlikuar.

Ekipet e angazhuara në terren kanë bërë të ditur se operacioni do të vijojë deri në përfundimin e kërkimeve. Autoritetet kanë theksuar se çdo zhvillim i ri lidhur me ngjarjen do të bëhet publik përmes njoftimeve zyrtare.