Tensionet në Lindjen e Mesme vijojnë të mbeten të larta, ndërsa raportimet flasin për një shtim të masave të sigurisë në Izrael për shkak të frikës nga një përshkallëzim i situatës dhe mundësisë së një sulmi balistik nga Irani.

Sipas mediave ndërkombëtare, objektiva të mundshme të një reagimi iranian mund të jenë infrastruktura energjetike e Izraelit dhe e vendeve të tjera të rajonit. Megjithatë, deri tani nuk ka konfirmim zyrtar për një sulm të afërt.

Pavarësisht lëvizjeve të shtuara ushtarake dhe pranisë së avionëve amerikanë në rajon, Aeroporti Ndërkombëtar Ben Gurion vijon të funksionojë normalisht, pa raportime për anulime fluturimesh.

Nga ana tjetër, Forcat e Mbrojtjes së Izraelit (IDF) nuk kanë njoftuar zyrtarisht ndryshim të nivelit të gatishmërisë apo masa të reja për popullsinë civile.

Ndërkohë, Teherani ka përsëritur qëndrimin e tij kundër presionit amerikan. Zëdhënësi i Komitetit të Sigurisë Kombëtare të Parlamentit iranian, Ebrahim Rezai, deklaroi se Irani nuk do të tërhiqet përballë presioneve dhe paralajmëroi për një reagim të ashpër në rast të një sulmi.

"Kjo është një iluzion që Benjamin Netanyahu ia ka paraqitur Donald Trumpit. Nëse Irani sulmohet, ne do ta kthejmë të gjithë rajonin dhe objektet e tij në Epokën e Gurit", u shpreh Rezai.

Zhvillimet po ndiqen me vëmendje nga komuniteti ndërkombëtar, ndërsa shqetësimet për një përshkallëzim të mëtejshëm të konfliktit në rajon mbeten të larta. Deri më tani, nuk ka njoftime zyrtare që konfirmojnë ndryshime të reja në situatën e sigurisë në Izrael.