Presidenti i Republikës, Bajram Begaj, ka dekretuar shpalljen e ligjit për ratifikimin e marrëveshjes së huasë ndërmjet Shqipërisë dhe Shteteve të Bashkuara të Amerikës, në kuadër të programit të Financimit të Jashtëm Ushtarak (FMF).

Dekreti, i firmosur më 30 korrik 2026, parashikon gjithashtu hyrjen e menjëhershme në fuqi të ligjit, duke i hapur rrugë zbatimit të marrëveshjes pas përfundimit të procedurave ligjore.

Marrëveshja është lidhur ndërmjet Ministrisë së Financave të Shqipërisë dhe Agjencisë Amerikane për Bashkëpunimin në Fushën e Sigurisë dhe Mbrojtjes (DSCA), dhe parashikon një hua prej 302 milionë dollarësh për forcimin e kapaciteteve ushtarake të vendit.

Kuvendi i Shqipërisë e miratoi marrëveshjen më 27 korrik 2026 me 74 vota pro. Deputetët e Partisë Demokratike bojkotuan votimin, ndërsa opozita ka njoftuar se do ta ankimojë marrëveshjen në Gjykatën Kushtetuese.