Një ngjarje e pazakontë është regjistruar në plazhin Marina di Ragusa, në Siçili, ku qindra mijëra euro përfunduan në det dhe më pas u nxorën në breg nga dallgët. Pushuesit mbetën të habitur kur panë pako të mbushura me kartëmonedha që notonin në ujë, ndërsa shumë prej tyre nxituan t’i merrnin.

Sipas autoriteteve italiane, gjithçka nisi pasi një skaf i vogël mbeti pa karburant pranë portit të Marina di Ragusa. Në bord ndodheshin katër persona, dy prej të cilëve zbritën për të siguruar karburant, ndërsa një burrë dhe një i mitur mbetën në mjet, i cili u shty nga rrymat drejt bregut.

Pushuesit njoftuan rojën bregdetare, duke menduar se skafi ishte në vështirësi. Megjithatë, sapo mjeti i autoriteteve iu afrua për ndihmë, dy personat që ndodheshin në bord nisën të hidhnin në det dhjetëra pako të mbushura me para.

Rrymat detare i sollën pakot deri në breg, ku pushuesit filluan të merrnin kartëmonedhat. Pak minuta më vonë, në zonë mbërritën policia, karabinierët dhe efektivët e policisë financiare, të cilët rrethuan plazhin, sekuestruan shumicën e parave dhe identifikuan disa persona që kishin marrë një pjesë të tyre.

Sipas autoriteteve, janë sekuestruar rreth 700 mijë euro, ndërsa nuk përjashtohet mundësia që një pjesë e shumës të mos jetë gjetur ende. Skafi është sekuestruar dhe është dërguar në port për ekzaminim, ndërsa tre persona janë arrestuar në kuadër të hetimeve.

Në bord ndodhej edhe një i mitur, i cili, sipas të dhënave paraprake, nuk kishte lidhje familjare me të arrestuarit. Hetuesit po verifikojnë nëse paratë kanë lidhje me aktivitete të krimit të organizuar apo me skema të pastrimit të parave.