Prokuroria e Posaçme (SPAK) ka dhënë detaje zyrtare lidhur me arrestimin në Francë të biznesmenit Ermal Beqiraj, i cili ishte shpallur në kërkim ndërkombëtar nga autoritetet shqiptare.

Sipas SPAK, ndaj Beqirajt po zhvillohen hetime për një sërë veprash penale, ndër të cilat “konkurrencë e paligjshme nëpërmjet dhunës”, “heqje e paligjshme e lirisë”, “shkelje e barazisë së pjesëmarrësve në tendera apo ankande publike”, “grup i strukturuar kriminal”, “pastrim i produkteve të veprës penale” dhe korrupsion aktiv.

Gjykata e Posaçme kishte caktuar ndaj tij masën e sigurisë “arrest në burg” në dhjetor të vitit 2025, ndërsa më pas ai u shpall në kërkim ndërkombëtar përmes Interpol Tirana me “njoftim të kuq”.

SPAK bën me dije se në qershor të vitit 2026 kërkoi bashkëpunimin e autoriteteve franceze për lokalizimin e Beqirajt, pasi dyshohej se ndodhej në Francë. Hetimet e autoriteteve franceze zbuluan disa pasuri që dyshohet se kanë origjinë kriminale, përfshirë llogari bankare me vlerë mbi 2 milionë euro, dy apartamente, mjete motorike dhe një kështjellë në departamentin Oise, me vlerë rreth 2.6 milionë euro.

Sipas njoftimit, pasuritë e identifikuara janë bërë objekt kërkesash për ndihmë juridike me qëllim sekuestrimin e tyre në kuadër të bashkëpunimit mes autoriteteve shqiptare dhe franceze.

Beqiraj u arrestua më 24 korrik 2026 nga autoritetet franceze, pasi hyri me një avion të lehtë në hapësirën ajrore të kufizuar pranë centralit bërthamor të Penly-t dhe u detyrua të ulej në një aerodrom në Somme. Gjykata franceze vendosi vijimin e paraburgimit të tij me qëllim ekstradimin drejt Shqipërisë.

SPAK njofton se hetimet financiare vijojnë për identifikimin, sekuestrimin dhe konfiskimin e pasurive të tjera të mundshme, ndërsa kërkesa për ekstradimin e shtetasit E.B. i është përcjellë Ministrisë së Drejtësisë për t’iu dërguar autoriteteve franceze.