Një aksident i rëndë është raportuar këtë të shtunë në një minierë në Bulqizë, ku paraprakisht dyshohet se një person ka humbur jetën.

Ngjarja ka ndodhur në një nga galeritë minerare në zonën e Tërnovës, në njësinë administrative Zerqan. Sipas informacioneve të para, një punëtor dyshohet se ka mbetur viktimë, ndërsa detajet mbi rrethanat e aksidentit nuk janë bërë ende të ditura.

Forcat e Policisë dhe grupi hetimor kanë mbërritur në vendngjarje dhe kanë nisur veprimet për zbardhjen e shkaqeve të aksidentit, si edhe për verifikimin e plotë të dinamikës së ngjarjes.

Autoritetet pritet të japin më shumë informacion pas përfundimit të veprimeve të para hetimore.