Presidenti i FIFA-s, Gianni Infantino, po përballet me një nga sfidat më të mëdha të mandatit të tij, pasi UEFA i ka kërkuar të largohet nga drejtimi i organizatës. Në të kundërt, organi evropian paralajmëron se do të nxisë një votim mosbesimi ndaj tij.

Sipas raportimit të The Telegraph, 55 federatat anëtare të UEFA-s janë të gatshme të mbështesin një mocion kundër Infantinos, ndërsa mjaftojnë 43 vota për të nisur zyrtarisht procedurën.

Në deklaratën e saj, UEFA kritikoi mënyrën e drejtimit të FIFA-s, duke theksuar se vendimmarrja nuk mund të bazohet në “skema të fshehta dhe afate të përshpejtuara”, ndërsa kërkoi përgjegjësi për vendimet që, sipas saj, nuk i shërbejnë interesave të futbollit. Sipas organit evropian, udhëheqja aktuale e FIFA-s ka humbur besimin e një pjese të madhe të komunitetit të futbollit.

Përplasja lidhet me propozimin e diskutueshëm për shitjen e aksioneve të Kupës së Botës te investitorë privatë, një plan që Infantino e tërhoqi pas kundërshtimeve të shumta brenda FIFA-s. Situata u tensionua edhe më tej pas dorëheqjes së këshilltarit të tij të lartë, Carlos Cordeiro, i cili kundërshtoi publikisht këtë iniciativë.

Infantino, i cili drejton FIFA-n që prej vitit 2016, synon të kandidojë për një mandat të katërt në zgjedhjet e vitit të ardhshëm, por zhvillimet e fundit e vendosin atë përballë një prej krizave më serioze të karrierës së tij.