Ish-burgu i Spaçit në Mirditë u kthye në një vend kujtese dhe reflektimi, ku Kardinali Ernest Simoni Troshani u rikthye pas dekadash në ambientet ku vuajti 12 vite burg gjatë regjimit komunist.

98-vjeçari vizitoi fillimisht qelitë dhe hapësirat e ish-burgut, duke u ndalur pranë fotografive të ish-bashkëvuajtësve. Më pas ai kremtoi Meshën e Shenjtë në oborrin e Spaçit, në praninë e ish-të përndjekurve politikë, besimtarëve, përfaqësuesve të komuniteteve fetare dhe autoriteteve.

Në fjalën e tij, Kardinali Ernest Simoni bëri thirrje për dashuri, unitet dhe mbrojtjen e së vërtetës.

“Jeni bijtë e të madhit Zot, të duani njëri-tjetrin, atdheun, me mbrojt të vërtetën. Falënderoj Zotin që na ka bashkuar, njerëzit që me admirim më kanë pritur”, u shpreh ai.

Ceremonia u shoqërua edhe me mesazhe për ruajtjen e kujtesës historike. Dom Gjergj Meta kërkoi që ish-burgu i Spaçit të mbrohet si një dëshmi e krimeve të diktaturës komuniste.

“Thirrja ime është për qeverinë shqiptare. Ky sit nuk duhet të shkatërrohet. Po u shkatërrua, brezat e rinj do të thonë se nuk ka ndodhur gjë. Kjo do të ishte fatkeqësia më e madhe, sepse ajo që harrohet, përsëritet”, deklaroi ai.

Edhe të pranishmit e cilësuan ceremoninë si një moment me domethënie të veçantë. Ish-i përndjekuri Albert Melyshi tha se Spaçi mbetet simbol i vuajtjeve dhe rezistencës ndaj diktaturës.

Në shenjë mirënjohjeje për jetën dhe dëshminë e tij gjatë përndjekjes komuniste, Kardinalit Ernest Simoni iu dorëzua një certifikatë mirënjohjeje dhe një dhuratë simbolike me emblemën e Spaçit.

Gjatë ceremonisë u lexua edhe një mesazh i Atit të Shenjtë, Papa Leone XIV, i cili e cilësoi Spaçin si një nga plagët më të dhimbshme të historisë shqiptare, por edhe si një vend ku besimi dhe shpresa triumfuan mbi padrejtësinë.

Aktiviteti u mbyll me lutje për viktimat e regjimit komunist dhe me një apel që historia e Spaçit të ruhet dhe të mos harrohet nga brezat e ardhshëm.