Policia e Tiranës ka zhvilluar një operacion të gjerë kontrolli në akset kryesore rrugore dhe në zona të ndryshme të kryeqytetit, me fokus evidentimin e shkeljeve ligjore dhe rritjen e sigurisë publike.

Aksioni u realizua nga Forca e Posaçme Operacionale dhe Forca e Posaçme “Shqiponja”, në bashkëpunim me Policinë Rrugore. Kontrollet u përqendruan kryesisht te automjetet luksoze, mjetet e blinduara, automjetet me xhama të errësuar përtej normave të lejuara, si dhe ato me modifikime që shkaktojnë zhurma shqetësuese në qytet.

Sipas policisë, qëllimi i operacionit ishte verifikimi i personave me precedentë kriminalë, kontrolli për armëmbajtje pa leje, posedim të lëndëve narkotike, kapja e personave në kërkim, si dhe evidentimi i shkeljeve administrative në qarkullim.

Gjatë kontrolleve u verifikuan 61 automjete luksoze dhe 82 shtetas me precedentë kriminalë në fusha të ndryshme. Autoritetet bënë të ditur se 11 automjeteve iu hoqën xhamat e errësuar në kundërshtim me Kodin Rrugor, ndërsa në total u konstatuan dhe u hoqën 61 xhama të errësuar, përfshirë edhe raste me xhamin e përparmë.

Nga kontrollet në terren rezultuan problematike 5 automjete, ku një prej tyre ishte i blinduar.

Ndërkohë, 6 persona janë shoqëruar nga policia pasi gjatë kontrolleve iu gjetën lëndë narkotike, shkopinj bejsbolli dhe shkopinj metalikë. Gjithashtu, u konstatua edhe një drejtues automjeti që drejtonte mjetin në gjendje të dehur.

Policia njoftoi se kontrollet do të vijojnë edhe në ditët në vijim, me fokus parandalimin e veprimtarive të paligjshme dhe garantimin e rendit e sigurisë në kryeqytet.