Një ngjarje e rëndë ka tronditur Beogradin, ku një 28-vjeçare ruse, e shpallur e zhdukur prej fundit të korrikut, është gjetur e pajetë brenda një valixheje pranë një kanali në periferi të kryeqytetit serb.

Viktima është identifikuar si Lyudmila Turkova, trupi i së cilës u gjet mbrëmjen e së enjtes nga banorë të zonës pranë kanalit në Padinska Skela, një zonë me popullsi të rrallë në anën tjetër të lumit Danub.

Pas gjetjes së trupit, autoritetet serbe kryen ekzaminimet mjeko-ligjore dhe konfirmuan identitetin e viktimës, e cila ishte raportuar e zhdukur disa ditë më parë.

Policia serbe ka arrestuar një 25-vjeçar me shtetësi turke, i cili dyshohet si autori i ngjarjes. Sipas autoriteteve, i dyshuari u ndalua në aeroportin e Beogradit teksa dyshohet se po përpiqej të largohej nga Serbia.

Hetimet paraprake kanë zbuluar se 28-vjeçarja dyshohet se është vrarë në orët e para të 26 korrikut në një apartament me qira në lagjen Borça të Beogradit. Më pas, sipas dyshimeve të hetuesve, trupi i saj është vendosur në një valixhe dhe është transportuar drejt zonës së Kanalit Vizelj, ku është braktisur.

Lyudmila Turkova ishte zhdukur mbrëmjen e 25 korrikut, pasi kishte humbur kontaktet me miqtë e saj dhe nuk u ishte përgjigjur më mesazheve. Pas denoncimit të zhdukjes, autoritetet nisën kërkimet dhe hetimet që çuan në zbulimin e trupit dhe arrestimin e të dyshuarit.

Prokuroria serbe ka marrë në dorë çështjen, ndërsa hetimet vijojnë për të zbardhur plotësisht motivin dhe rrethanat e vrasjes.