Këshilli Bashkiak i Rrogozhinës ka miratuar një projektvendim kundër shkrirjes dhe bashkimit të kësaj bashkie me Bashkinë e Kavajës, duke kundërshtuar planin e propozuar në kuadër të reformës territoriale.

Vendimi është marrë me dakordësi mes anëtarëve të Këshillit Bashkiak, pavarësisht përkatësive të tyre politike. Përfaqësuesit lokalë kanë argumentuar se çdo ndryshim territorial duhet të zhvillohet përmes një procesi transparent dhe duke marrë në konsideratë interesin e qytetarëve.

Kryetarja e Këshillit Bashkiak të Rrogozhinës, Desi Gixhari, lexoi qëndrimin e përbashkët të anëtarëve përpara votimit të projektvendimit.

“Nuk mund të pranohet një vendimmarrje që prek jetën e mijëra qytetarëve pa një proces transparent. Sot, pavarësisht bindjeve politike që kemi, na bashkon mbrojtja e interesit të qytetarëve të Bashkisë Rrogozhinë”, u shpreh Gixhari.

Ajo theksoi se për çështje që lidhen me të ardhmen e komunitetit, bashkëpunimi dhe interesi publik duhet të jenë mbi ndarjet politike.

Qëndrimi i Këshillit Bashkiak vjen në një kohë kur reforma territoriale dhe riorganizimi i njësive vendore janë bërë pjesë e debatit publik, me diskutime mbi efektet që mund të kenë ndryshimet administrative te shërbimet dhe përfaqësimi i komuniteteve lokale.