Vazhdon aktiviteti sizmik në zonën e Campi Flegrei në Itali, ku që prej ditës së djeshme janë regjistruar dhjetëra tërmete. Pas lëkundjes me magnitudë 4.7, më e forta e regjistruar në këtë zonë gjatë 40 viteve të fundit, sizmografët kanë evidentuar rreth 60 tërmete të tjera, pjesa më e madhe me intensitet të ulët.

Lëkundja më e fortë e orëve të fundit, me magnitudë 3.1, u regjistrua në orën 05:47 dhe u ndje qartë nga banorët në Pozzuoli dhe Bacoli, por edhe në disa lagje të Napolit.

Për orën 10:00 është thirrur një tjetër mbledhje e Qendrës së Koordinimit të Emergjencave, e aktivizuar një ditë më parë nga prefekti i Napolit, Michele di Bari. Kryetarët e bashkive, forcat e rendit, Mbrojtja Civile dhe institucionet e tjera të përfshira do të analizojnë situatën dhe masat që duhen marrë.

Ndërkohë po vazhdojnë kontrollet strukturore në ndërtesa. Gjatë natës, zjarrfikësit evakuuan 18 familje në rrugën Sannino dhe katër të tjera në rrugën San Vitagliano.

Porti i Pozzuolit do të mbetet i mbyllur, ndërsa Autoriteti Portual i Detit Tirren Qendror po përgatit një urdhër për ndalimin e hyrjes në zonat detare shtetërore që ndodhen poshtë shpateve shkëmbore, për shkak të rrezikut të shembjeve.

Frikë dhe shqetësim mes banorëve

Kryetari i bashkisë së Bacolit, Josi Gerardo Della Ragione, deklaroi se mes qytetarëve ka një shqetësim të madh.

Sipas tij, në Bacoli janë regjistruar shembje të pjesshme të shpateve shkëmbore dhe rënie suvaje nga disa ndërtesa, por kontrollet e kryera deri tani nuk kanë evidentuar banesa të pabanueshme.

Ai bëri të ditur gjithashtu se në Bacoli nuk është evakuuar asnjë qytetar dhe nuk janë raportuar persona të plagosur.

Kontrollet do të vazhdojnë në zonat shkëmbore pranë detit, në bashkëpunim me Kapitanerinë e Portit, por edhe në shkolla.

Kryebashkiaku pranoi se situata është e vështirë dhe se frika e qytetarëve është e kuptueshme, por bëri thirrje për bashkëpunim dhe unitet për përballimin e emergjencës.

Shumë banorë kaluan natën jashtë shtëpive

Në Pozzuoli dhe në periferinë perëndimore të Napolit, shumë qytetarë vendosën të mos flinin në banesat e tyre pas tërmetit me magnitudë 4.7, i cili shkaktoi dëme dhe frikë të madhe në zonën e Campi Flegrei.

Bashkitë e Napolit dhe Pozzuolit aktivizuan zona pritjeje në Via Terracina dhe në Palatrincone, ku u drejtuan dhjetëra familje.

Të tjerë zgjodhën ta kalonin natën në automjetet e tyre ose në banesat e familjarëve dhe miqve.

Një 70-vjeçar nga zona e Agnanos tregoi se pas frikës së përjetuar nga tërmeti ishte e pamundur të qëndronte gjatë natës në shtëpi.

Ai tha se lëkundja ishte jashtëzakonisht e fortë dhe dukej sikur nuk përfundonte, ndërsa dera e apartamentit ishte bllokuar dhe nuk hapej.

Banorët e zonës janë prej vitesh të mësuar me fenomenin e bradizmit, por intensiteti i lëkundjeve të fundit ka shtuar ndjeshëm shqetësimin për sigurinë e ndërtesave dhe aftësinë e tyre për t’u përballur me goditje të tilla sizmike.

Pamjet: ANSA