PERUXHA – Një muzikant 55-vjeçar me origjinë nga Sicilia ka humbur jetën në një dhomë hoteli në qendër të Peruxhas, ndërsa partnerja e tij ndodhet në gjendje të rëndë shëndetësore. Dyshimet paraprake lidhen me një helmim të mundshëm nga monoksidi i karbonit.

Ngjarja po hetohet nga Karabinierët italianë, të cilët aktualisht po përqendrohen te pista e një aksidenti. Sipas hetimeve fillestare, dhoma ku ndodhej çifti ishte pranë një impianti kaldaje dhe autoritetet po verifikojnë nëse rrjedhja e gazit mund të ketë ardhur nga kjo zonë.

Çifti kishte udhëtuar drejt Peruxhas për një aktivitet muzikor, ku do të merrnin pjesë në një koncert të zhvilluar në Sala dei Notari, së bashku me një grup prej rreth 40 muzikantësh.

Alarmi u dha pasi kolegët e tyre vunë re mungesën e çiftit në aktivitetin e planifikuar. Pas kontrollit në dhomën e hotelit, ata u përballën me situatën tragjike dhe njoftuan menjëherë autoritetet.

Partnerja e muzikantit u transportua në spital, ku ndodhet nën kujdesin e mjekëve, ndërsa hetimet vijojnë për të përcaktuar shkakun e saktë të vdekjes dhe rrethanat e incidentit.