VLORË – Një vatër e madhe zjarri përfshiu mbrëmjen e së premtes zonën kodrinore të Palasës, pranë hyrjes së tunelit, duke djegur një sipërfaqe të konsiderueshme me shkurre dhe pemë.

Sipas informacioneve paraprake, flakët u shfaqën pak para mesnatës dhe u përhapën me shpejtësi, të favorizuara nga kushtet e terrenit. Tymi i dendur mbuloi një pjesë të vijës bregdetare, duke krijuar shqetësim për banorët dhe pushuesit në zonë.

Për përballimin e situatës janë angazhuar forcat zjarrfikëse, Policia e Shtetit dhe punonjës të Administratës së Zonave të Mbrojtura, të cilët vijojnë punën për izolimin e vatrës së zjarrit.

Ndërkohë, gjatë ditës së sotme pritet të ndërhyjë edhe një helikopter për të mbështetur operacionin nga ajri, me qëllim vënien nën kontroll të flakëve dhe shmangien e përhapjes së tyre në zona të tjera.