TIRANË – Shqipëria po fiton gjithnjë e më shumë vëmendje si një destinacion tërheqës për pensionistët amerikanë që dëshirojnë të jetojnë jashtë Shteteve të Bashkuara.

Revista prestigjioze Forbes e ka përfshirë Shqipërinë në listën e vendeve të rekomanduara për pensionistët në vitin 2026, duke e renditur mes 96 destinacioneve të përzgjedhura në 24 shtete të ndryshme.

Vlerësimi i publikuar nga Forbes është bazuar në një sërë kriteresh, si kostoja e jetesës, cilësia e jetës, sistemi shëndetësor, rreziku klimatik, infrastruktura dhe mikpritja ndaj pensionistëve amerikanë.

Për Shqipërinë, revista veçon si destinacionet më tërheqëse Tiranën, Durrësin, Vlorën dhe Sarandën, të cilat ofrojnë kombinimin e jetës urbane, klimës mesdhetare dhe afërsisë me bregdetin.

Sipas Forbes, një nga avantazhet kryesore të Shqipërisë është kostoja e ulët e jetesës, dukshëm më e përballueshme krahasuar me Shtetet e Bashkuara. Ky faktor e bën vendin një alternativë interesante për pensionistët që synojnë të reduktojnë shpenzimet, pa hequr dorë nga një cilësi e mirë jetese dhe aksesi në shërbime.

Interesi në rritje për Shqipërinë si destinacion për pension është pjesë e një tendence më të gjerë, ku gjithnjë e më shumë qytetarë amerikanë po zgjedhin të kalojnë vitet e pensionit në vende që ofrojnë kosto më të ulëta, klimë të favorshme dhe standard të mirë jetese.