PRISHTINË – Lidhja Demokratike e Kosovës (LDK) është e gatshme të rikthehet në tryezën e bisedimeve me Lëvizjen Vetëvendosje (LVV) për arritjen e një marrëveshjeje që do të mundësonte formimin e institucioneve të reja, megjithatë analistët vlerësojnë se përçarjet e brendshme në LDK dhe mungesa e konsensusit politik vazhdojnë të jenë pengesa serioze.

Nënkryetari i LDK-së, Lufti Haziri, deklaroi se Kuvendi i partisë, i mbajtur më 30 korrik, ka miratuar në parim pjesëmarrjen e LDK-së në procesin e negociatave me LVV-në, me synimin për të shmangur mbajtjen e zgjedhjeve të reja.

Sipas Hazirit, LDK mbetet e palëkundur në tri parime themelore për një marrëveshje të mundshme: dakordësi për të gjitha institucionet – Kuvendin, Qeverinë dhe Presidencën – një agjendë të përbashkët shtetërore dhe ndarje të qartë të përgjegjësive. Ai theksoi se tashmë i takon LVV-së të tregojë nëse është e gatshme t’i pranojë këto kushte.

Megjithatë, procesi mbetet i ndërlikuar. Kuvendi i fundit i LDK-së evidentoi ndarje të thella brenda partisë, ku kryetari Lumir Abdixhiku siguroi vazhdimin e mandatit me një diferencë të ngushtë votash. Kjo situatë ngre pikëpyetje nëse të gjithë deputetët e LDK-së do të mbështesin një marrëveshje eventuale me LVV-në.

Edhe ushtruesja e detyrës së presidentes, Albulena Haxhiu, e cilësoi pozitiv rikthimin e dialogut ndërmjet partive, duke bërë thirrje për intensifikimin e përpjekjeve në funksion të konstituimit të institucioneve të dala nga zgjedhjet e 7 qershorit.

Analistët politikë mbeten skeptikë se një marrëveshje do të jetë e mjaftueshme për të garantuar formimin e institucioneve. Sipas tyre, sfida kryesore mbetet zgjedhja e presidentit të vendit, e cila kërkon mbështetje të gjerë parlamentare. Përplasjet brenda LDK-së dhe mungesa e një shumice prej 80 votash mund ta çojnë Kosovën sërish në zgjedhje të parakohshme.

Seanca konstituive e Kuvendit është caktuar për më 6 gusht, ndërsa ditët në vijim pritet të jenë vendimtare për fatin e institucioneve të reja të Kosovës.