GJIROKASTËR – Një vatër e madhe zjarri ka mbetur aktive gjatë gjithë natës në zonën mes fshatrave Asim Zeneli dhe Saraqinisht, duke angazhuar forcat zjarrfikëse në një operacion të pandërprerë për izolimin dhe shuarjen e flakëve.

Sipas Drejtorisë së Mbrojtjes nga Zjarri dhe Shpëtimit (MZSH) Gjirokastër, sinjalizimi për zjarrin është marrë rreth orës 22:50. Flakët janë përhapur me shpejtësi në një terren të vështirë, të mbuluar me bimësi të dendur, shkurre dhe bar të thatë, duke e bërë ndërhyrjen e ekipeve më të vështirë.

Në operacion janë angazhuar të gjitha strukturat e MZSH Gjirokastër, ndërsa pritet t’u bashkohen edhe zjarrfikësit me kontratë të përkohshme, si dhe forcat vullnetare të Bashkisë, për të përforcuar përpjekjet në terren.

Autoritetet bëjnë të ditur se situata mbetet serioze, ndërsa operacioni për vënien nën kontroll të flakëve vijon me intensitet të lartë.

Ndërkohë, qytetarëve u është bërë thirrje të shmangin lëvizjet pranë zonës së prekur dhe të respektojnë udhëzimet e autoriteteve, deri në neutralizimin e plotë të vatrës së zjarrit.