Një tërmet i fuqishëm ka tronditur mbrëmjen e së premtes zonën vullkanike të Campi Flegrei, në jug të Italisë, duke shkaktuar panik në Napoli dhe qytetet përreth. Lëkundja, me magnitudë paraprake 4.7, u regjistrua rreth orës 19:46 dhe, sipas Institutit Kombëtar të Gjeofizikës dhe Vullkanologjisë (INGV), është më e forta e regjistruar ndonjëherë në këtë zonë të prekur nga fenomeni i bradisizmit.

Pas goditjes kryesore, aktiviteti sizmik vijoi me një seri pasgoditjesh. Deri në mbrëmje u regjistruan të paktën nëntë lëkundje të tjera, ndërsa një tjetër tërmet i fortë u ndje rreth orës 22:00. Situata krijoi panik te banorët, mijëra prej të cilëve dolën nga banesat dhe qëndruan në ambiente të hapura nga frika e lëkundjeve të tjera.

Dëmet më të konsiderueshme u raportuan në Pozzuoli, një nga zonat më të prekura. Një mur mbrojtës pranë linjës hekurudhore Cumana u shemb mbi shina, duke detyruar pezullimin e qarkullimit të trenave. Si masë sigurie, autoritetet ndërprenë përkohësisht edhe funksionimin e linjave Cumana, Circumflegrea dhe të metrosë për kontrolle teknike.

Në disa zona u regjistruan rrëshqitje shkëmbinjsh, ndërsa në nënkalimin Savino Vitagliano gurë dhe materiale ranë mbi automjete. Gjithashtu, në disa ndërtesa u raportuan dëmtime të suvave dhe elementëve të brendshëm, ndërsa disa banorë mbetën përkohësisht të bllokuar në apartamente për shkak të deformimit të dyerve.

Menjëherë pas tërmetit, autoritetet italiane aktivizuan strukturat e emergjencës. Prefektura ngriti Qendrën e Koordinimit të Emergjencave, ndërsa ekipet e Mbrojtjes Civile nisën verifikimet në terren për të vlerësuar dëmet dhe për të garantuar sigurinë e qytetarëve.

Sipas INGV-së, tërmeti lidhet me fenomenin e bradisizmit, një proces natyror që shkakton ngritjen dhe uljen graduale të tokës në zonën e Campi Flegrei si pasojë e aktivitetit nëntokësor. Instituti theksoi se një lëkundje me magnitudë 4.7 nuk ishte regjistruar më parë në këtë fazë të aktivitetit sizmik, duke tejkaluar edhe tërmetet me magnitudë 4.6 të regjistruara gjatë vitit 2025.

Lëkundjet u ndjenë në shumë lagje të Napolit, përfshirë Vomero, Chiaia, Fuorigrotta, Soccavo dhe Colli Aminei. Në disa zona pati ndërprerje të përkohshme të energjisë elektrike dhe probleme me rrjetin telefonik, ndërsa shërbimet teknike punuan për rikthimin e normalitetit.

Banorët përshkruan momente paniku, duke treguar se lëkundjet ishin të forta dhe zgjatën disa sekonda. Shumë familje vendosën të mos riktheheshin menjëherë në banesat e tyre nga frika e pasgoditjeve.

Ndërkohë, ekipet e specializuara vijojnë kontrollet në infrastrukturën e qytetit. Një dëmtim i pjesshëm është raportuar edhe në një shtyllë të tensionit të lartë në zonën e Agnanos, ndërsa furnizimi me energji elektrike është rikthyer pjesërisht në shumicën e zonave të prekura.