Presidenti i FIFA-s, Gianni Infantino, po përballet me kundërshtimin më të madh ndaj një prej projekteve të tij më ambicioze. Plani për krijimin e shoqërisë së re “FIFA Forward Enterprise”, e cila do të menaxhonte aktivitetet tregtare dhe organizative të turneve kryesore të FIFA-s, po has në rezistencë të fortë nga konfederatat kontinentale dhe brenda vetë institucionit.

Projekti, i cilësuar nga kritikët si një formë e centralizimit ose “privatizimit” të futbollit botëror, synon të përfshijë menaxhimin e Kupës së Botës për meshkuj e femra, si dhe Kupës së Botës për Klube, me premtimin për të rritur të ardhurat e FIFA-s.

UEFA, CONCACAF dhe AFC bashkojnë forcat kundër projektit

Pas kundërshtimit të parë nga UEFA, fronti i opozitës u zgjerua me mbështetjen e CONCACAF-it dhe së fundmi edhe të Konfederatës Aziatike të Futbollit (AFC), duke e lënë Infantinon pa shumicën e nevojshme për të miratuar projektin në Kongresin e FIFA-s.

Në deklaratën e saj zyrtare, AFC kërkoi rishikimin urgjent të mënyrës së qeverisjes dhe vendimmarrjes në FIFA, duke kritikuar mungesën e konsultimeve me konfederatat dhe federatat anëtare.

“Ftojmë FIFA-n të nisë një rishikim urgjent të kuadrit të saj të qeverisjes dhe të procesit të vendimmarrjes, për të garantuar që propozimet me rëndësi globale të hartohen përmes konsultimeve të duhura dhe përfshirjes së të gjitha palëve të interesuara”, thuhet në reagimin e AFC-së.

Infantino humbet shumicën

FIFA përbëhet nga 211 federata kombëtare, secila me një votë në Kongres. Për miratimin e projektit nevojitet një shumicë e thjeshtë, por sipas raportit aktual të forcave, Infantino nuk e gëzon më atë.

Fronti kundërshtues, i udhëhequr nga UEFA, CONCACAF dhe AFC, kontrollon rreth 143 vota, ndërsa mbështetësit e projektit llogariten në rreth 70 vota, duke e bërë praktikisht të pamundur miratimin e nismës në formën aktuale.

Dorëhiqet Carlos Cordeiro

Goditja më e rëndë për presidentin e FIFA-s ka ardhur nga brenda organizatës. Carlos Cordeiro, këshilltari i tij më i afërt dhe një nga figurat më me ndikim në strukturat drejtuese, ka paraqitur dorëheqjen në shenjë proteste.

“Nuk mund të rri e të shoh ndërsa FIFA po shqyrton mundësinë e shitjes së një pjese të Kupës së Botës. Nuk kam pasur asnjë rol në këtë propozim dhe i kundërvihem pa asnjë mëdyshje. Është një marrëveshje e keqe për federatat anëtare, për futbollin dhe për të ardhmen afatgjatë të këtij sporti”, deklaroi Cordeiro për Sky Sports.

Një figurë kyçe në FIFA

Carlos Cordeiro konsiderohet një nga bashkëpunëtorët më të rëndësishëm të Infantinos. Ish-president i Federatës Amerikane të Futbollit (US Soccer) dhe ish-zëvendëspresident i Goldman Sachs, ai shërben si këshilltar i lartë i presidentit të FIFA-s që prej vitit 2021 dhe ka qenë pjesë e rëndësishme e organizimit të Kupës së Botës 2026 në SHBA, Meksikë dhe Kanada.

Me kundërshtimin në rritje të konfederatave kryesore dhe largimin e një prej bashkëpunëtorëve të tij më të afërt, Gianni Infantino përballet me një nga sfidat më serioze të mandatit të tij. Në kushtet aktuale, projekti “FIFA Forward Enterprise” duket se nuk ka mbështetjen e nevojshme për të kaluar në votim, duke e vendosur presidentin e FIFA-s në një pozitë të vështirë politike dhe institucionale.