ITALI – Mbrojtësi i Kombëtares shqiptare, Mario Mitaj, është zyrtarisht lojtar i Genoas. Klubi italian njoftoi transferimin e 22-vjeçarit nga Al-Ittihad në formë huazimi me të drejtë blerjeje.

Mitaj, i lindur më 6 gusht 2003 dhe produkt i akademisë së AEK Athens, ka kryer vizitat mjekësore dhe është bashkuar me skuadrën e re për sezonin e ardhshëm në Serie A.

Mbrojtësi i majtë numëron 32 paraqitje me Kombëtaren e Shqipërisë, duke qenë pjesë edhe e ekipit që mori pjesë në Kampionatin Europian 2024. Në nivel klubesh, ai ka zhvilluar 142 ndeshje me AEK Athens, Lokomotiv Moskën dhe Al-Ittihad, duke luajtur në kampionatet e Greqisë, Rusisë dhe Arabisë Saudite, si edhe në kompeticionet vendase e kontinentale.

Me Al-Ittihad, Mitaj fitoi kampionatin dhe Kupën e Mbretit gjatë sezonit 2024/25.

Drejtori i futbollit te Genoa, Diego Lopez, vlerësoi afrimin e mbrojtësit shqiptar.

“Mario është një lojtar që kombinon dy karakteristika të rëndësishme: cilësinë teknike në ndërtimin e lojës dhe forcën mendore që nuk duhet t’i mungojë Genoas. Mirë se erdhe, Mario”, u shpreh Lopez.

Edhe vetë Mitaj u shpreh i lumtur për transferimin në elitën e futbollit italian.

“Të bashkohesha me një klub si Genoa dhe të luaja në Serie A ishte një objektiv. Dua të nis menjëherë punën në një ambient që më jep motivim të madh”, deklaroi futbollisti kuqezi.