TIRANË – Deputeti socialist Erion Braçe ka reaguar pas rritjes së çmimit të naftës në tregun vendas, ku sipas tij karburanti ka arritur në 214-216 lekë për litër, ndërsa variantet e tjera shiten edhe më shtrenjtë.

Përmes një reagimi në rrjetet sociale, Braçe ka kërkuar rikthimin e Bordit të Transparencës për monitorimin e çmimeve të karburanteve, duke pretenduar se rritja e fundit është e qëllimshme dhe mund të ndikojë negativisht në sezonin turistik.

Sipas deputetit socialist, rritja e çmimeve në prag të fundjavës dhe në periudhën e fluksit më të madh turistik mund të kufizojë lëvizjen e qytetarëve dhe të dëmtojë destinacionet turistike.

"Nafta kërceu sot në 214-216 lekë për litër. E zakonshmja kjo. Nafta tjetër, ajo e mira që nuk të djeg makinën, nis me 218 dhe arrin në 230 lekë për litër", shkroi Braçe.

Ai akuzoi tregtarët e karburanteve se kanë zgjedhur pikërisht periudhën e pikut turistik për të rritur çmimet, duke e cilësuar këtë si një veprim të planifikuar.

"E qëllimtë? Ja bën muuuuuuuu!", u shpreh Braçe, duke shtuar se kishte paralajmëruar më herët nevojën për rikthimin e Bordit të Transparencës.

Sipas tij, gjatë periudhës kur funksiononte Bordi i Transparencës, kompanitë e karburanteve nuk kishin mundësi të rrisnin çmimet sipas interesit të tyre, ndërsa pas heqjes së tij ekziston rreziku i abuzimeve.

Braçe argumentoi se një rritje e mëtejshme e çmimeve të karburanteve mund të ketë pasoja jo vetëm për konsumatorët, por edhe për turizmin, duke e bërë më të kushtueshme lëvizjen drejt zonave turistike.

Bordi i Transparencës për çmimet e karburanteve u krijua gjatë krizës energjetike pas nisjes së luftës në Ukrainë, me qëllim monitorimin e çmimeve dhe reagimin ndaj luhatjeve në tregjet ndërkombëtare. Vendimmarrja për rikthimin ose jo të tij mbetet një çështje politike dhe ekonomike që kërkon vlerësim nga institucionet përkatëse.