TIRANË – Partia Demokratike ka akuzuar qeverinë se po përdor punësimet me kontrata të përkohshme si instrument politik për të ndikuar te pjesëmarrësit në protestat e fundit. Në një deklaratë nga selia blu, nënkryetari i PD-së, Nikola Kedhi, pretendoi se ekzekutivi ka miratuar 100 vende pune pesëmujore pa procedura transparente dhe pa konkurrim publik.

Sipas Kedhit, me vendimin e Këshillit të Ministrave nr. 582, datë 22 korrik 2026, janë shtuar 100 pozicione me emërtimin "Specialist arkivi", ndërsa vendet e punës, sipas tij, nuk janë shpallur publikisht dhe emrat e përfituesve kanë qenë të përzgjedhur përpara miratimit të vendimit.

Ai pretendoi se në listë përfshihen kryesisht të rinj dhe studentë nga fusha të ndryshme, duke e cilësuar procesin si një skemë punësimi të motivuar politikisht dhe jo mbi bazën e meritës.

Kedhi ngriti gjithashtu pikëpyetje mbi mënyrën e financimit të këtyre kontratave, duke deklaruar se, ndonëse punonjësit do të ushtrojnë detyrën pranë Drejtorisë së Përgjithshme të Arkivave, pagesat e tyre parashikohen të mbulohen nga disa institucione të ndryshme shtetërore. Sipas tij, kjo mënyrë financimi synon të shmangë transparencën mbi shpenzimet publike.

Në deklaratën e tij, zyrtari i PD-së pretendoi se hyrja në fuqi e efekteve financiare të vendimit më 1 gusht përkon me zhvillimin e protestave të të rinjve dhe e cilësoi këtë si një përpjekje të qeverisë për të zbutur ose dobësuar pjesëmarrjen në protestë përmes ofertave për punësim të përkohshëm.

Partia Demokratike kërkoi transparencë për procedurat e ndjekura në këto punësime dhe u bëri thirrje institucioneve përgjegjëse të verifikojnë ligjshmërinë e procesit. Deri tani nuk ka një reagim zyrtar nga qeveria lidhur me këto pretendime.

Deklarata e nënkryetarit të PD, Nikola Kedhi:

Sot dua të bëj publik një denoncim të ardhur nga brenda administratës shtetërore. Me VKM nr. 582, datë 22 korrik 2026, qeveria ka shtuar 100 vende pune me kontrata të përkohshme pesëmujore, të gjitha me një emërtesë të vetme: ‘Specialist arkivi’. Vendet nuk janë shpallur publikisht. Nuk ka pasur asnjë konkurrim. Nuk ka pasur kritere të bëra publike. Ndërkohë, emrat kanë qenë gati përpara vendimit të këshillit të ministrave.

VKM-ja u miratua më 22 korrik dhe efektet financiare fillojnë më 1 gusht. Por kur u përzgjodhën 100 emrat, si u përzgjodhën kur vendet nuk u shpallën dhe nuk pati asnjë konkurs? 100 emrat e paracaktuar janë të rinj, mes tyre edhe studentë që ende nuk kanë mbaruar Bachelor-in. Profile nga ekonomia, drejtësia, mjekësia, psikologjia, agronomia. Shumë profesione të ndryshme, por me qëllimin e qeverisë për të pasur një specialitet të vetëm: besnikërinë.

Pra, për ta thjeshtuar: nuk janë hapur vendet për t’u zgjedhur kandidatët. Janë zgjedhur emrat, dhe pastaj është përgatitur vendimi për t’i punësuar. Këta të rinj nuk kanë faj që dikush u premtoi një vend pune. Fajin e ka ai që ndërton skema të tilla dhe tregon edhe njëherë se çfarë mendon për të rinjtë, dhe se si i trajton për interesat e tij.

Vendimi vetë ngre pyetje që nuk u gjendet asnjë përgjigje e ndershme. Çfarë pune arkivi kërkon njëqind veta për pesë muaj? Pse paguhen nga dhjetë institucione të ndryshme, kur të gjithë, sipas vetë vendimit, në pikën 2, punojnë në një vend të vetëm, te Drejtoria e Përgjithshme e Arkivave? Përgjigjja dihet: kur një shpenzim copëtohet nëpër dhjetë buxhete, asnjë shifër s’duket e madhe dhe asnjë sy publik s’e kap dot të plotë. Kjo është teknikë fshehjeje. Dhe për këtë do duhet të jetë e vëmendshme dhe KLSH.

Një detaj që flet vetë është fakti se efektet financiare fillojnë më 1 gusht. Pikërisht kur të rinjtë janë në shesh. Dhe ky është thelbi. Kjo nuk është thjesht shkelje ligjore, por një operacion i mirëfilltë politik. Rama nuk po punëson arkivistë. Po përpiqet të blejë heshtjen e të rinjve me të gjitha mënyrat, pikërisht kur një brez i tërë i është kundërvënë në rrugë, me qellimin e vetem për të arkivuar revoltën më të madhe të tre dekadave të fundit.

Rama po përdor dy duar kundër të rinjve: me njërën u jep kërbaçin në shesh, me tjetrën u tund kontrata pesëmujore, me shpresën se do t’i blejë, t’i përçajë dhe të minojë protestën. Ne thelb kjo eshte vetem nje nga shume format qe ai perdor per minimin e protestes. Nuk do ja dale! Te rinjte nuk mashtrohen.

Nuk u jep një të ardhme, siç nuk e ka bërë në asnjë nga vitet e sundimit të tij. U jep vetëm pesë muaj. Nuk u jep meritokraci. U jep një vend të përkohshëm në një listë, për aq kohë sa t’i shërbejë interesit të tij. Nuk u garanton liri. U kërkon heshtje. Përtej denoncimit, unë sot dua t’u flas pikërisht të rinjve, edhe atyre 100 emrave në listë.

Ju nuk jeni problemi. Ju jeni prova e problemit real: në këtë vend, edhe puna e parë e një të riu duhet të kalojë nga dora e partisë. Edhe i riu i saposhkolluar duhet të përdoret nga kjo qeveri, ndryshe rruga e vetme për të është blerja e një bilete pa kthim. Kjo është fyerja, jo nga ne, nga ata që këtë e kanë ndërtuar model sundimi.

Ekziston një rrugë tjetër dhe këtë e themi me përgjegjësi e garanci. Punë që fitohet me konkurs të hapur, ku CV-ja vlen më shumë se telefonata, apo interesat politike e elektorale. Një ekonomi ku biznesi i vogël dhe sipërmarrësi i ri nuk mbyten nga taksat e nga miku i pushtetit që fiton çdo tender. Pagë që nuk ta ha inflacioni, se ekonomia bazohet te prodhimi, inovacioni, konkurrenca, arsimi, jo te fasadat, koncertet, narkotrafiku e listat elektorale. Dhe një shtet ku nuk të duhet askush ‘i fortë’ pas krahëve për të ecur përpara.

Kjo është zgjedhja e vërtetë përpara rinisë shqiptare. Jo ‘pesë muaj me Ramën ose dëbim’, por një vend ku e ardhmja jote nuk varet nga asnjë parti, përveç aftësive të tua. Rama mendon se rinia blihet me pesë muaj punë. Mendon se taktika të tilla do shuajnë qëndresën heroike të të rinjve shqiptarë për mbi dy muaj. Rinia shqiptare nuk shitet. Por do ta ndryshojë vetë këtë vend, duke i dhënë një mësim të mirë atyre që tentojnë të tallen me të.