Lëvizja Vetëvendosje (LVV) dhe Lidhja Demokratike e Kosovës (LDK) kanë shprehur gatishmërinë për të rifilluar bisedimet për formimin e institucioneve të reja, pas pezullimit disa javë më parë të negociatave.

Procesi ishte ndërprerë nga kreu i LDK-së, Lumir Abdixhiku, i cili ishte përballur me një votëbesim brenda partisë, por arriti të ruajë postin e tij. Pas këtij zhvillimi, të dyja palët janë shprehur të gatshme të rikthehen në tryezën e negociatave, ndërsa seanca konstituive e Kuvendit të Kosovës është caktuar për 6 gusht.

Ushtruesja e detyrës së presidentes, Albulena Haxhiu, zhvilloi një takim me përfaqësuesit e partive parlamentare për përgatitjen e agjendës së seancës, duke theksuar rëndësinë e vazhdimit të dialogut mes forcave politike.

Nga ana e LVV-së, deputetja Arbërie Nagavci deklaroi se pret rifillimin e bisedimeve me LDK-në, duke theksuar se vendi ka nevojë për funksionalizimin sa më të shpejtë të institucioneve. Ndërkohë, Lumir Abdixhiku bëri të ditur se pezullimi i negociatave është hequr dhe se LDK mbetet e hapur për diskutime.

Edhe deputetja e LDK-së, Jehona Lushaku-Sadriu, konfirmoi gatishmërinë për dialog, megjithëse tha se ende nuk ka një ftesë zyrtare për takim nga lideri i LVV-së, Albin Kurti.

LVV fitoi zgjedhjet parlamentare të 7 qershorit me 53 mandate dhe, së bashku me deputetët e pakicave joserbe, pritet të sigurojë shumicën për krijimin e Qeverisë. Megjithatë, për zgjedhjen e presidentit të ri nevojitet prania e të paktën 80 deputetëve në Kuvend, çka e bën të rëndësishëm një marrëveshje me LDK-në, e cila ka 18 mandate.

Nëse presidenti nuk zgjidhet brenda 60 ditëve nga konstituimi i Kuvendit, Kosova do të shkojë në zgjedhje të reja parlamentare.