Ndryshime të reja janë bërë në strukturat drejtuese të Policisë së Shtetit, ku disa drejtues janë transferuar dhe janë komanduar emra të rinj në poste kyçe.

Neritan Nallbati, i cili mbante detyrën e drejtorit të Departamentit të Policisë Kriminale në Drejtorinë e Përgjithshme të Policisë së Shtetit, është transferuar në Akademinë e Sigurisë.

Në vend të tij në krye të Departamentit të Policisë Kriminale është komanduar Arjan Muça.

Ndryshime janë bërë edhe në Departamentin e Marrëdhënieve Ndërkombëtare. Drejtuesi i këtij departamenti, Pëllumb Seferi, është transferuar gjithashtu në Akademinë e Policisë, ndërsa në këtë pozicion është komanduar Artan Bajraktari.

Sipas burimeve, në ditët në vijim pritet të përcaktohen edhe drejtuesit e rinj të departamenteve të tjera në Policinë e Shtetit, në kuadër të procesit të riorganizimit të strukturave drejtuese.