GJIROKASTËR – Një aksident rrugor është regjistruar në aksin Gjirokastër–Tepelenë, në kthesën e fshatit Hormovë, ku është përfshirë aktori i humorit Sejfulla Myftari, i njohur për publikun si “Cekja”.

Automjeti tip “Mercedes-Benz”, që drejtohej nga Myftari, është përplasur me një automjet tip “Ford”, në timonin e të cilit ndodhej Baba Sheh Hormova, klerik bektashian.

Sipas informacioneve paraprake, përplasja nuk ka qenë frontale, duke shmangur pasoja në njerëz. Të dy drejtuesit e mjeteve kanë shpëtuar pa lëndime, ndërsa aksidenti ka shkaktuar vetëm dëme materiale.

Në vendngjarje kanë mbërritur efektivët e Policisë Rrugore të Gjirokastrës, të cilët po punojnë për zbardhjen e rrethanave të aksidentit.