Protestë në Klos kundër reformës territoriale, administrata vendore ndërpret punën

Punonjësit e administratës së Bashkisë Klos kanë dalë në protestë kundër propozimit për riorganizimin administrativo-territorial, i cili parashikon shkrirjen e kësaj bashkie.

Në shenjë kundërshtimi, administrata vendore ka bojkotuar punën, duke kërkuar që propozimi të rishikohet nga institucionet përgjegjëse.

Protestuesit kanë paralajmëruar se aksioni do të vijojë deri në marrjen e një vendimi tjetër lidhur me të ardhmen e Bashkisë Klos.

Reagime të ngjashme priten edhe në Belsh dhe Prrenjas, dy bashki që, sipas propozimit të mazhorancës, mund të përfshihen gjithashtu në procesin e riorganizimit territorial.

Një ditë më parë, protesta u zhvilluan edhe në Poliçan. Gjatë tubimit, disa qytetarë të lidhur me Partinë Socialiste dogjën teserat e anëtarësisë, ndërsa drejtuesi lokal i PS-së njoftoi dorëheqjen përpara protestuesve.