SHBA – Presidenti amerikan Donald Trump ka njoftuar se i ashtuquajturi “Bordi i Paqes” ka arritur një marrëveshje për çarmatimin e Hamasit dhe transferimin e administrimit politik e të sigurisë së Gazës te një qeveri e përkohshme palestineze. Sipas planit, procesi do të zhvillohet në disa faza gjatë shtatë deri në tetë muajve të ardhshëm.

Një zyrtar amerikan deklaroi në një konferencë për mediat se marrëveshja parashikon dorëzimin e armëve nga Hamasi në këmbim të tërheqjes graduale dhe përfundimtare të forcave izraelite nga Rripi i Gazës.

Nga ana tjetër, anëtari i Hamasit, Ghazi Hamad, konfirmoi për Al Jazeera se negociatat kanë përfunduar me një marrëveshje, por theksoi se organizata nuk do të nisë procesin e çarmatimit përpara se Izraeli të fillojë tërheqjen nga territori.

Megjithatë, burime zyrtare izraelite, të cituara nga media vendase, kanë bërë të ditur se Izraeli nuk është i gatshëm të tërhiqet nga asnjë pjesë e Gazës pa u realizuar më parë çarmatimi i plotë i Hamasit. Edhe deklaratat e Trump në platformën Truth Social sugjerojnë se procesi i tërheqjes do të lidhet me përfundimin e çarmatimit.

Në reagimin e tij, Trump e cilësoi marrëveshjen si një "hap historik" drejt paqes dhe sigurisë në rajon, duke theksuar se ajo parashikon çarmatimin e plotë të Hamasit dhe të grupeve të tjera të armatosura, krijimin e një administrate të re palestineze dhe vendosjen e një Force Ndërkombëtare të Stabilizimit që do të bashkëpunojë me një forcë të re policore palestineze.

Presidenti amerikan falënderoi Egjiptin, Katarin dhe Turqinë për rolin e tyre ndërmjetësues, ndërsa deklaroi se marrëveshja është pjesë e zbatimit të "Planit 20-Pikësh" të administratës së tij.

Pavarësisht optimizmit të shprehur nga Uashingtoni, zbatimi i marrëveshjes mbetet i pasigurt. Ende nuk janë bërë publike detaje mbi përbërjen e administratës së re palestineze, vendet që do të marrin pjesë në forcën ndërkombëtare të stabilizimit apo afatet konkrete të vendosjes së saj.

Sipas planit, autoritetet e Hamasit do t’ia dorëzojnë armët një force të re policore palestineze, e cila do të trajnohet nga misioni ndërkombëtar dhe do të mbështesë procesin e çarmatimit, duke operuar ndërmjet zonave palestineze dhe forcave izraelite.

Një zyrtar amerikan bëri të ditur se zbatimi i plotë i planit pritet të zgjasë rreth 200 deri në 250 ditë, duke theksuar se përparësi do t’i jepet verifikimit të çdo hapi nga të dyja palët dhe jo shpejtësisë së procesit.

Sipas të njëjtit zyrtar, SHBA-ja vlerëson se Irani ka ushtruar presion ndaj Hamasit për të mos e pranuar marrëveshjen, por grupi palestinez, sipas Uashingtonit, nuk ka ndjekur këto rekomandime.