Gazetari Marin Mema ka dalë kundër idesë për hapjen e një konsullate serbe në Shkodër, duke e cilësuar një projekt të tillë si të papranueshëm.

Sipas tij, në Shkodër nuk ekziston një minoritet serb që do të justifikonte hapjen e një përfaqësie konsullore të Serbisë.

“Në Shkodër nuk ka minoritet serb. Nuk ka”, shprehet Mema, duke theksuar se në zonën e Vrakës jeton vetëm një pakicë modeste malazeze, e njohur zyrtarisht nga shteti shqiptar.

Ai argumenton se identiteti i këtij komuniteti nuk mund të përdoret si arsye për praninë e një konsullate serbe në një qytet me historinë dhe rëndësinë e Shkodrës.

Ndryshe nga rasti i Shkodrës, Mema mbështet fuqimisht hapjen e një konsullate shqiptare në Luginën e Preshevës.

Sipas tij, Presheva, Bujanoci dhe Medvegja janë zona të banuara nga shqiptarë, të cilët kanë të drejtë ta kenë shtetin shqiptar pranë dhe të përfitojnë mbështetje institucionale e diplomatike.

Ai e cilëson këtë si një detyrim kushtetues të Shqipërisë dhe kritikon Tiranën zyrtare se nuk e ka zbatuar seriozisht këtë përgjegjësi ndër vite.

“Në Luginë duhet hapur një konsullatë shqiptare. Kjo është e vonuar”, thekson Mema.

Sipas tij, shqiptarët e Luginës së Preshevës kanë nevojë për mbështetje të plotë, të qartë dhe të dëshmuar, jo vetëm përmes një konsullate, por edhe përmes formave të tjera të ndihmës institucionale.

Megjithatë, ai kundërshton që hapja e konsullatës shqiptare në Luginë të shoqërohet me një konsullatë serbe në Shkodër si formë reciprociteti.

Mema vlerëson se nuk ekziston asnjë arsye demografike, historike apo institucionale që Shkodra të ketë një konsullatë serbe.

Ai e mbyll reagimin me një thirrje kundër lëshimeve diplomatike dhe hapjes së konsullatave të huaja në zona ku, sipas tij, nuk ekzistojnë minoritete që do ta justifikonin praninë e tyre.

“Boll me këto lëshime”, përfundon Marin Mema.

Komenti i plotë

Jo konsullatë serbe në Shkodër!

Në Shkodër nuk ka minoritet serb. Nuk ka! Në Vrakë ka një pakicë modeste malazeze të njohur zyrtarisht nga shteti shqiptar, por kaq. Çdo projekt për hapjen e një konsullate serbe në qytetin me histori të lashtë, Shkodër, është i papranueshëm!

Lugina e Preshevës, Bujanoci dhe Medvegja janë troje shqiptare, të banuara nga shqiptarë dhe kanë të drejtë ta kenë shtetin shqiptar pranë; ky është një detyrim kushtetues. Madje, Tirana zyrtare nuk e ka zbatuar kurrë seriozisht këtë detyrim. Në Luginë duhet hapur një konsullatë shqiptare‼️ Kjo duhet me çdo kusht, madje është e vonuar‼️ Shqiptarëve të Luginës u duhet mbështetje e plotë, e qartë, e faktuar, përmes një konsullate dhe gjithçkaje tjetër‼️Sa i takon Shkodrës… nuk ka asnjë arsye që të ketë në këmbim një të tillë serbe! Boll me këto konsullata greke, konsullata serbe, në vende ku nuk ka asnjë lloj minoriteti as serb dhe as grek! Boll me këto lëshime!

Foto dhe shkrimi ©️: Profili i autorit në Facebook