POLIÇAN – Banorët e Poliçanit i vunë flakën teserave të Partisë Socialiste gjatë protestës së zhvilluar këtë të enjte kundër Reformës Administrativo-Territoriale 2.0, duke kundërshtuar planin për shkrirjen e bashkisë së tyre.

"Digjini kartat e teserat e partisë. Ne nuk ekzistojmë më… po na shkrijnë", dëgjoheshin të thërrisnin protestuesit gjatë tubimit.

Qytetarët kërkuan që Poliçani të vijojë të jetë bashki më vete, duke theksuar se ndryshimi i statusit administrativ do të dëmtojë të ardhmen e qytetit dhe të brezave të rinj. Gjatë protestës u firmos edhe një peticion, ku kërkohet që Bashkia e Poliçanit të mos përfshihet në reformën territoriale.

Në pankartat e mbajtura nga protestuesit shkruheshin mesazhe si: "Poliçani nuk preket", "Mos na vrisni të ardhmen", "Harram i paçi votat e Poliçanit" dhe "Deputetë dele, mos e votoni reformën".

Pas nisjes së protestës, kryetari i Partisë Socialiste në Poliçan, Erion Zylyftari, njoftoi publikisht dorëheqjen nga detyra. Duke folur para qytetarëve, ai e cilësoi vendimin për shkrirjen e Bashkisë së Poliçanit një padrejtësi dhe një turp të madh ndaj banorëve të qytetit.