TIRANË – Kryetari i Partisë Demokratike, Sali Berisha, deklaroi se nuk mbështet asnjë projekt që nuk është në përputhje me ligjin, duke iu referuar projektit të zhvillimit në Zvërnec.

I ftuar në emisionin “Off the Record” në A2 CNN, Berisha tha se projekti nuk respekton legjislacionin kombëtar dhe ndërkombëtar, duke theksuar se në zonat e mbrojtura çdo investim duhet të plotësojë kushtet ligjore përkatëse.

Sipas tij, për zonën në fjalë është dhënë leje zhvillimi dhe leje ndërtimi, por kjo e fundit është anuluar më pas me kërkesë noteriale të pronarit. Berisha pretendoi se projekti është miratuar pa u plotësuar kushtet e kërkuara nga ligji dhe se nuk mund të zhvillohet një investim në një pronë që është objekt i një procesi gjyqësor.

Kreu i opozitës akuzoi kryeministrin Edi Rama se ka vepruar në kundërshtim me ligjin, duke e trajtuar çështjen “sikur të ishte kopshti i tij privat”, ndërsa shtoi se lejet e ndërtimit janë dhënë pa respektuar procedurat dhe kriteret ligjore.