TIRANË – Kryetari i Partisë Demokratike, Sali Berisha, deklaroi se është i gatshëm të votojë një ndryshim kushtetues që kufizon mandatin e kryeministrit në maksimum dy mandate.

I ftuar në emisionin “Off the Record” në A2 CNN, Berisha tha se, megjithëse një klauzolë e tillë nuk është domosdoshmërisht standarde, ajo është e dobishme për realitetin shqiptar. Sipas tij, përvoja e qeverisjes së Edi Ramës tregon nevojën për një kufizim të tillë.

“Jam gati të votoj një klauzolë të tillë. Ta sjellin dhe unë e votoj me të dy duart. Jam njeri që respektoj Kushtetutën dhe jam gati ta votoj ndryshimin kushtetues që nesër”, u shpreh Berisha.

Ai argumentoi se kërkesa për kufizimin e mandateve bazohet në situatën aktuale politike, duke akuzuar kryeministrin Edi Rama se është shndërruar në një “diktator të urryer” dhe se mandati i katërt është, sipas tij, rezultat i zgjedhjeve të vjedhura.

Berisha shtoi se vendosja e një kufiri prej dy mandatesh për kryeministrin do të ishte një mekanizëm për të shmangur përqendrimin e pushtetit dhe për të mbrojtur funksionimin e demokracisë në vend.