TIRANË – Qytetarët u mblodhën për të 61-ën ditë radhazi në protestë kundër qeverisë, duke nisur marshimin nga Sheshi “Skënderbej” drejt Kryeministrisë, me kërkesën për dorëheqjen e kryeministrit Edi Rama.

Me pankarta dhe thirrje kundër korrupsionit, protestuesit deklaruan se tubimet do të vijojnë deri në largimin e kreut të qeverisë. Gjatë protestës, aktivistët akuzuan Ramën për keqqeverisje dhe thanë se presioni qytetar po rritet dita-ditës.

Në tubim morën fjalën edhe qytetarë të ardhur nga diaspora dhe të moshuar, të cilët shprehën shqetësimet për emigracionin, gjendjen ekonomike, shërbimet publike dhe kërkuan ndryshim politik. Protesta u zhvillua nën masa të shtuara sigurie dhe vijoi pa incidente.