Kryeministri Edi Rama ka deklaruar se nuk do të japë dorëheqje pavarësisht protestave dhe thirrjeve të kundërshtarëve politikë.

Gjatë një adresimi me drejtuesit politikë të Partisë Socialiste dhe kryetarët e komisioneve parlamentare, Rama tha se mandati i qeverisë buron nga vota e qytetarëve dhe se misioni i saj do të vijojë.

“Ata pretendojnë se janë vetë populli, por të jemi të qartë, me ligj e me zakon, as ata nuk janë populli e as ne, të gjithë jemi pjesë e tij. Mund të flasim në emër të popullit vetëm nëse ai na e jep këtë mandat”, u shpreh Rama.

Duke iu referuar thirrjeve “Rama jepe dorëheqjen”, kryeministri tha se ato mund të vazhdojnë, por nuk do të ndikojnë në vendimin e tij.

“Mua ajo këngë më pëlqen. Kushdo le të këndojë, kur të dojë le të pushojë, misioni ynë do të vazhdojë derisa të mbarojë me vendosjen e flamurit të Skënderbeut dhe Ismail Qemalit në oborrin e BE”, deklaroi Rama.